GRABIEL Y MARÍA

UNO
Jue Grabiel el mejol mozu del puebru,
y María la mocina
más repulía y güena de la Sierra:
la que siempri salía
de la puerta p’ajuera de su casa,
—ya juesi día de trucu gordu o víspira—
más remondá que la patena ‘el cura,
peripuesta comu una muñequina,
sonriénduli a to’l que se topaba,
con aquel joyininu en la barbilla
y aquellus ojus grandis, relucientis,
comu acitunas negras, guapa, lista,
mirandu to y pol to d’arriba a abaju,
comu dánduli gracias a la vida
de dejal-la vivil tan ricamenti
y precural-li tantas alegrías.

Cuandu, por en metá ‘el mediu ‘e la Barrera,
caminu de la juenti ella súbía
con el su jatu siempri tan relimpiu
y al cuadril la botija,
na más de vel-la tan retecompuesta,
la calli rebullía
y s’apartaban pa jadel-li pasu
los mozus qu’allí había,
mentris las mozas le ponían jocicus
de coraji y d’envidia.

Quinci añus jaría pa Setiembri
y no había otra en toa la serranía
que juesi güena, guapa y jaciendosa
comu lo era María:
pura comu los chorrus de la juenti,
casta comu los cantis de la misa,
fresca comu el joréu de la sierra,
jonrá comu la Vilgin de la elmita.

Jamás dingunu osó comprometel-la:
primeru pol sel chica
y aluegu por el miéu a los sus padris
que, cudiandu tan sólu d’esta hija,
precuraban con tinu careal-li
los mosconis que ya la persiguían
con muchu desimulu
a cuarquiel sitiu qu’ella sola iba.

Jue Grabiel el mejol mozu del puebru,
y María la mocina
en quien pusu los ojus una tardi
cuandu salían dambus de la misa:
Grabiel cuasi que mediu s’atrangulla
al vel qu’ella le daba agua bendita;
y ella, al notal qu’el mozu la miraba
—nunca naidi l’había miráu asina—
con él estuvu a piqui de chocalsi
sólu de vel la cara que ponía
cuandu Grabiel le diju mu bajinu,
con miéu y a escondichas,
apartándula un pocu del barullu
de genti que salía
de la igresia a la pal que salian ellus:
“¡Dios te sarvi, María!
Si yo juera el Grabiel que mandó el cielu
a la Vilgin, jincáu de roíllas,
lo mesmu qu’él le diju en aquel intri
yo cuasi te diría:
que nunca vierun antis los mis ojus
ni cara más bonita
ni espeju en el que yo poel miralmi
qu’a mí me precurasi tanta dicha;
y que jaci lo menus sieti mesis
que sólu sé pensal en ti, María;
que l’he juegáu las güeltas a tu madri,
desdi entoncis, pa vel si yo pudía
encuentral un buequinu pa dicilti
toas las ansias que llevu aquí escuendías:
que me pasu las nochis cuasi en vela
y ya no m'agunatu más estas fatigas
sin icilti que tengo, de pol juerza,
que velti a solas p’ahí arriba,
(craru está, si de mal no te se jaci
y no te fartu en na yo con mis cuitas)
polque ni es de recibu ni tie casu
que yo esté asín penandu nochi y día,
puyendu habralti y velti a cuarquiel hora,
si d’ellu eris confolmi tú, María.
Dimi si sí o si no aquí rondamenti,
que tengu la chinostra toa perdía
de pensal a ca istanti en tu persona,
de querelti en silenciu y a escondichas.”

Se queó la dagala comu múa,
con la garganta seca y más transía
que si una sajatá l’habieran dáu
en metá ‘e la barriga.
Peru, en sacandu juerzas de lo jondu,
que cuasi la probita ni tenía,
pos to aquellu la jizu atranguñilsi
comu quien comi migas
sin vinu ni café a media mañana,
jue y le diju que sí, sin más, María.
Y desd’el mesmu istanti ya se quisun
comu naidi ha queríu en esta vida.

La luna despregó su cola branca
ca nochi que salían,
y en lo artu ‘e los cielus las estrellas
un corru le jadían
pa que alumbrasi juerti los amoris
de Grabiel y María.
Se quisun comu en una zarzalera
el colorín quieri a su colorina.
S’asperaban, se vían, s’ajuntaban
y ajilaban aluegu to p’arriba,
pa los pinus copúus de l’arta sierra,
pa dembaju ‘e los robris, pa las viñas,
bien lejus de la genti, de las casas,
pa ondi jacin los níus las calnizas.
S’azorzolaban entri los castañus,
acagazáus a vecis; d’alegría
sartaban otras pol los práus y vegas,
corriendu lindoneras pol las fincas,
pa esparijilsi, si no vían a naidi,
a sus anchas, jiciéndusi caricias
o mirándusi fijus pa los ojus
y comiéndusi a besus pa la elmita.

Jue Grabiel el mejol mozu del puebru,
y María la mocina
que mandarun sus padris a Plajencia
pa qu’estudiasi y si jiciesi fina
y aprendiesi con monjas la parlanga
que galreaban las señoritingas.

Queó Grabiel más solu qu’una juenti
agostá de sequía.
Se jizu joscu com’un gatu ‘e monti.
Con naidi rebullía
ni s’arriscaba con los sus helmanus
ni de rangua con naidi se le vía,
ni golvió a ajijeal pol las tabelnas,
ni golvió a ajurreal pol las esquinas.
Asperó, comu asperan en el níu
a sus padris las crías,
y arrebujó otra vez risas y besus
en un zurrón de cábilas y cuitas,
y s’amontó com’un garduñu esquivu
entri las legartijas,
arraclanis, juronis y bestardus
que jurrichean entri las cardinchas,
más p’allá de los robris y castañus,
de la regüerta ‘el Moru más p’arriba.

Jue Grabiel otra vez el mejol mozu
cuandu golvió María
del conventu ‘e las monjas ‘e Plajencia,
más lista y más pulía,
y cuandu, na más vel-lu, jue y le diju
qu’ella a las monjas nunca más se iba
y que pensaba estalsi toas las tardis
siempri con él hasta d’anochecía.

Y juerun esus mesis los mejoris
que pudun encuentral en toa su vida,
precurándusi el unu por el otru,
a ca istanti del día:
aguardánula él cuandu de casa
ella, ya jateá, por fin salía,
descompuesta pol vel-lu y presurosa;
o cuandu a él a caballu se le vía
a cuarquiel hora, abandonandu el güertu,
arrejuyendu rastras, poas y binas,
atajandu cordelis y bardíus,
jollandu con el jacu breñas, pitas,
cañijelras, calquesas, ceborranchas,
en cuantis poel guipal-la se golía.

Vinun nochis en brancu,
tardis de durcis mielis, besus, risas,
mañanas de rocíu y embelesu...
Perjumi de jaranciu y gamonitas
traían en el pelu pol las nochis
cuandu, jartus de amol, se despidían
dambus con una sombra a la cintura
de cansanciu y de brisa.
Se quisun comu pocus s’han queríu:
con to’l amol del mundu y sin mentiras.
Más quiziás ‘e seis añus juerun novius.
Siempri juntus pa to ya se les vía.

DOS
Jue Grabiel el mejol mozu del puebru,
y María la mocina
que se casó con Don Germán, el méicu,
pol cientus de razonis de la vida
y por otras tantas que le dio su madri,
que pa jadel casorius tenía vista.


TRES
Cuandu Grabiel hoy pasa cabisgachu,
por el renti, en silenciu, de María,
anque se rocin de raspajilera,
ni siquiera se miran.
Sólu unus pecis paji que le jurgan
a María pol las tripas
y a Grabiel lo atrangulla una paloma
que dici qu’antovía
lleva atorá pa endentru del gargueru
pegánduli aletazus y bien viva.

Grabiel sigui escuajandu los toconis,
esbrozandu las viñas,
regandu tomateras y escarolas,
juegandu pol las tardis a la brisca,
seriu com’un salgentu,
jurdiu com’una enguila;
y desdi jaci un añu,
tras casalsi de prontu con su prima,
sólu a vecis le salin dos jochinus
juntu a las carrilleras, sigún miras,
comu si emprencipiara ya a riilsi,
comu si jueran a nacel-li risas,
ca ves que ve los ojus verdiazulis
de su hija María.

Jue Grabiel el mejol mozu del puebru,
y por esu María,
cuandu tuvu el primel chirivejinu,
Grabiel quisu llamal-lu, com’un día
s’había llamáu tamién aquel güen mozu
que tantu la quería.

CUATRU
La otra tardi, en la juenti de la praza,
juegaba el dagalinu de María
a jadel barru y puchas con el agua.
Al su láu había una dagalina
con ojus verdiazulis y compuesta
com’una muñequina.
Grabiel, dendi su casa los miraba:
miraba a la su hija
comnu juegaba a gustu con el hiju
de la mujel del méicu. Y María,
de Don Germán diendu de bracileti,
fingiendu que no vía,
peru sin poel apartal d’ellus los ojus,
otru tantu sintía
de vel a Grabielinu palroteandu
con la niña María.

Juan José camisón (MARABAJAS)