EL TÍU BUJU

Pos a mí m’aconteci de nochi
lo que sólu le pasa a los cárabus:
¡Me se ponin los ojus reondus
y m’ajuyi to’l sueñu pitandu!
Me barruntu com’un jolmiguillu
que no puéu ni siquiá estal sentáu
y me entra un ajogu en el cuerpu
y unas ganas de dilmi a argún láu...
...Pa la jesa a correl los cordelis,
o pa’l monti, pa ausal-li a los canchus,
o a escuchal con la luna esus ruíus
que s’escuchan pa’n vera ‘e los charcus...
...Y es qu,’en viendu venil qu’anocheci,
me se güervi to’l cuerpu azogáu,
me s’enllenan las venas de juerza
y m’ajuyin tos esus nubráus
que de día la chinostra m’atontan
y me dejan cuasi abombilláu.
¡Tie que sel qu’estoy malu pol juerza
o sino es qu’andu mediu embrujáu!
Ni me tumba el sorongu a las nuevi,
ni a las dies o a las onci m’apranu:
pa que yo ya, cansinu, m’ajongui
tien que sel pol lo menus las cuatru.
Mentris tantu no paru un minutu:
m’espariju en la calli ca y cuandu,
vengu y voy de la cuadra a la estroji
o m’enréu a asestil los guarrapus,
sargu y entru d’ajuera p’adrentu,
miru el techu pa vel si hay morgañus...
Voy dispués, un candil en la manu,
pa la sala y remiru los cuadrus
con la cara y la crus de los Cristus
y los ojus torcíus de los Santus...
Coju aluegu y enjilu pa’l arca
pa miral si d’allí sacu argu:
cuatru rueas de sayas, tres múas,
un mandil y un sortún coloráu,
dos pendientis de pera y un jilu,
un chalecu con brochis doráus,
cincu librus de pellica 'e vaca,
la escritura ‘e la casa, un retratu
y un pesinu que siempri aquí estuvu y
que naidi ha sabíu nunca usal-lu...
...Me recorru más tardi vasaris,
alacenas, rebatis y almarius
y le miru los ramus y caras
que pintáus llevan jarras y pratus... .
..Doy aluegu en abril los corralis,
voy a vel si la chota ha mamáu,
l’echu piensu a la potra y al mulu,
deju to ya asestíu y endonáu
y m’enréu en ordenal los aperus
pa dejal los avíus colocáus,
o me sientu en un ruscu mu grandi,
qu’en el mediu ‘el corral hay jincáu,
y me pongu a miral las estrellas
pa inventalmi aleluyas un ratu,
y me deju alumbral de la luna,
que no esisti farol más baratu...
¡Sólu asina me quéu amorráu!
Paeci entoncis que sientu un remansu
que m’enllena las patas de lana
y me poni cansinus los brazus,
dos bolindris de promu en los ojus
y los déus comu mediu borrachus;
me se jacin d’estopa los sesus
y hasta hay nochis que cuasi me caigu
del pedruscu pensandu en visionis
que m’atontan las sienis un tantu.
Peru, en na que me notu escurrilmi,
deseguía escarranchu los brazus
y, lo mesmu que si un rejileti
m’anduviesi el cogoti jurgandu,
pegu un brincu y, ¡mecachis en diela!,
me se va la morrera a otru láu.
¡Ya puéu dil ensartandu frejonis
o picánduli berza al guarrapu
o escuajandu cuartillas ‘e chícharis
o enristrandu cebollas y ajus,
porque d’éstas ya voy aviáu
cuandu menus d’aquí pa las cuatru,
y hasta velmi metíu en el catri
tú pon puntu que farta un güen ratu!
M’he de dil hasta el Valli ‘e las Burras
ondi está toa la genti trillandu
pa buscal un poquinu ‘e caraba
con argunu que no esté roncandu,
o alargalmi, atrochandu vereas,
en el burru montáu o a caballu,
cuandu menus pa cerca del Cáparra
o quiciás cuasi pa los Campazus.
Luegu ya sí, cansinu, me vengu,
mallugáu de los güesus y jartu
d’estiral-li del rabu a la nochi
y en la panza con un güen buracu,
y me metu pa casa a toa priesa,
un coscurru de pan rebuscandu
pa tapalmi el bujeru de jambri
que las tripas me va arreguñandu.
Sacu entoncis a escapi un chorizu
o me fritu un cachinu ‘e tasaju,
o m’enjilu un cuartillu de lechi,
o con vinu dos güevus me batu.
Sólu asina m’enroscu en la cama
y me quéu dormíu d’un sopapu.
¡Mira tú que yo deba pasal
pa dormilmi por esti carvariu!

Juan José Camisón: MARABAJAS