EL PARTU DE LA LICHONA

Mos parió la cochina
doci lichonis
gordus y relucientis
comu tejonis.
¡Mas la joía
con la pezuña gacha
mató a una cría!

Onci me quean,
que lo mesmu con suerti
se desenrean.

Al día siguienti,
patasarriba,
había en la legareta
dos guarrapinas.
Y es que la madri
las atortó en el intri
de dil a echalsi.

Nuevi me quean,
que lo mesmu con suerti
se desenrean.

Anda unu escasinu,
escuchimizáu,
y otru no enjalla teta
y le dan de láu.
Si me se tuercin,
a vel si acasu
sacu p’alantri
los otrus sieti.

Me se torcierun
y los dambus ha un ratu
me se murierun.

Sieti me quean,
que lo mesmu con suerti
se desenrean.

Y asina cumpru
los compromisus
que desdi antañu
tengu asquiríus:
unu ha de sel pa’l cura,
otru pa’l méicu,
otru pa la comadri
y otru pa’l réitu
de los durus pedíus
pa las boticas
de cuandu estuvu mala
la mi chiquina.

Con esta cuenta
tres ya me quean,
que lo mesmu con suerti
se desenrean.

A mi mujel anochi
se l’ha antojáu
que le guardemus unu
pa mi cuñáu.
¡Tamién es casu
qu’estandu en éstas
se presenta aquí el tíu
con una cesta!

Se lo ha lleváu.
¡Con un parmu ‘e naricis
mos ha dejáu!

Mira pol dondi
dos m’han queáu
y el unu anochi mesmu
me l’han robáu.

Ya ni con mucha suerti
se desenrea,
polque l'he jechu
lo que debí jadeli
a tos cuentus ellos:
lo he escamondáu,
y pa cenal aluegu,
lo tengu asáu!
...
Estandu en éstas,
vinun los amus
y al lichón entri dambus
se lo cenarun...
...
Vaya güen partu
que saqué de ganancias
tres menus cuartu.

Juan José Camisón (MARABAJAS)